今日只有一個活動: 義大遊樂世界
由酒店可以經商場行過去, 亦可以坐免費穿梭巴士, 幾分鐘就到.
落車行過對面馬路, 入口在這座商場入面, 入場時會吸印仔, 中途可以離場. 全區是以
希臘情境為主題來建造，園區共分為3大區域： 大衛城、聖托里尼山城、特洛伊城.
除了機動遊戲, 仲有表演, 一入場大劇院有"天神的生日"歌舞劇, 我地入左去睇, 劇場好靚, 但表演麻麻, 好似睇緊N年前鄭小秋時代香港小姐選舉的表演.
睇完隔離又有魔幻馴水師表演, 似音樂噴泉, 都OK.
之後可以去機動遊戲部分, 有單軌車連接, 但好多人排隊, 其實好近, 我地選擇行過去.
爸爸要玩户外刺激的機動遊戲: U型滑板雲霄飛車, 激流, 自由落體….等
我地就去聖托里尼山城影希臘小白屋.
糖果屋好可及愛
火山廣場間中有表演
下午有巡遊, D公仔大家都唔識既, 所以….覺得唔好睇囉!
今日星期五, 遊人唔算多, 巡遊開始之後, 旅行團, 學校團體更開始陸續離場, 下午3點過後, 樂園好小人, 玩咩都唔洗排隊.
我地去左特洛伊城
飛車睇落平平無奇, 玩落都幾激! 第一次矇查查....我坐最右邊位, 原來有D路後段係飛左出去, 因為在天台好高, 好得人驚!
玩完大小姐要再玩, 最右邊位當然係大小姐坐, 但今次又有D唔同, 轉數唔同左, 其中一個位自轉左5-6次, 玩完暈陀陀.
特洛伊城除了天台有幾樣機動遊戲, 其他都是室內, 落雨都無有怕. 咁啱我地玩完天台的鞦韆和飛車, 真係落雨.
好彩室內好多野玩, 大人小朋友都有, 有個叫飛越台灣的3D, 好好睇, 不過可能之前轉得太勁, 玩到飛越台灣已經頂唔順, 暈暈地想嘔.
木馬屠城, I like.
呢幾位就係樂園主打characters, 驢仔身上揪Rambo式紅籮白夠攪笑.
呢款玩水槍, 可以射對方隻船, 好好玩.
我地留守到最後, 義大夜景都幾靚. 原本想睇埋電子夜光巡遊, 點知因為天雨取消左, 可惜!
入場可以免費坐商場頂的大麼天輪, 但是日維修, 18:00後重開又無通知, 令到我地無得玩, 扣分!
由10:30玩到19:00, 又唔算攰, 可能地方細細, 唔洗走來走去, 又唔洗排隊.
四十幾樣遊戲, 大人正價NT890, 都抵玩, 下午3點後入場更有折扣. 但千萬別選農曆年或台灣大假期前來, 旺日迫爆!
樂園隔壁就是義大購物廣場, 購物廣場分 A、B、C三棟.
A棟最近酒店, 主要賣食品, 天台有摩天輪.
B棟是名牌outlet mall, 有天幕廊道, 頂樓露天部分叫123廣場, 有台式小吃, 舞台偶爾有表演.
C棟有溜冰場, 國賓影城, 運動主題館Sport-Zone, 運動品店及food court
離開樂園就是C棟. 大小姐看到有攀石, NT250, 又要玩, 於是爸爸陪玩, 我和阿E逛街.
大半小時回來後, 小姐還意猶未盡, 原來可以繼續任玩, 但就無裝備, 只可以攀爬較矮部分.
原本想去A棟吃金色三麥, 但一來一回好遠, 改了在food court吃, 今晚大家戰抖力不足, 三碗肉燥飯加兩客斑鳩的窩炸豬排
吃完大小姐繼續攀石, 因為無咩客, 爸爸仲可以落場免費玩
我和阿E繼續逛街, 無咩好買, 價錢唔平, 最後只係買左豬肉紙做手信.
一小時後返黎, 大小姐終於散晒, 表情同舊年爸爸嚮喀比攀完整天一模一樣.
最後經天台123廣場回酒店
沒有留言:
張貼留言