呢程車要個零鐘，食飽就補眠一下先，尋晚成點先瞓，唔夠精神．沿途好靚禾田．
到左碼頭落大雨，換好泳衣，拎埋fin, 等一陣雨細左就落船go go go ～
落船又眠一眠，半個鐘之後終於抵達美人魚島，時為10:15am，都算快！
同團除了我們一行六人，另外只得兩位日本人，八人佔一個灘，爽！
聽聞有3、4間公司攪美人魚島行程，各佔一個灘頭，我地個團係Mantanani Paradise，落户Gugong Beach，離遠見到有另外公司既船登陸Palm Beach．灘上有涼亭、枱椅、洗手間，水清沙幼，唔錯！唔錯！剛好在島中央，兩面都係沙灘．
影下相隻船番黎，載多左幾位resort住客一起出海浮潛．
海底景色唔錯，以hard coral為主！
看片:
隔離有另外一隻船，應該係早前登陸Palm Beach的強國人，好多唔識浮潛，大家捉住條繩由隻船拖行．潛了大約一小時，回沙灘午餐．燒雞翼、燒蝦、腸仔、咖哩雞、炒菜兩味、炒麵及白飯，仲有清水及可樂各一，團餐而言都算豐富；除了腸仔，其他食物味道都唔錯！食飽飽就等另一次出海浮潛．點知隻船番黎話送我地去resort check in，出面浪大唔可以再潛，兩位日本人day tour都要預備回程．吓！好失望喎，仲幾好天架！1pm 咋喎！！
Resort嚮另一個灘，轉個灣就到．有位叫May的女仔係劉先生下屬，島上負責照顧我地兼做翻譯，尋日有客人所以已經入左黎先．佢都話下午出唔到海，咁無辦法．Resort 呢邊沙灘無阻擋，海浪大好多．
呢度係大廳，食飯、睇電視都係呢度．
我地就係住呢類屋仔，兩人一間，有浴室，有冷氣，但無熱水．供電就5:30pm至 7:00am. 叫做住得下，唔可以話舒適；好過島上另一間resort連浴室、冷氣都無，房間有點暗，記得帶電筒．
下午無無聊聊，環島行下，踏住微微雨去了漁村，去雜貨店買左小小汽水零食，今朝趕住起程，未入貨．
返到Resort又hea 下hea下，好無聊．無得上網，大家玩紙牌，睇電視、打遊戲機．
7pm開餐囉！全Resort得我地六人，包場，加了一盤龍蝦和兩大條紅魚，夾埋RM200 (HK$500)，雖然龍蝦細細隻，但好鮮甜，我地落order漁民先送過黎架，daily catch！兩條魚一蒸一炸，炸魚非常好食，朋友話係斑，我唔識睇．另外仲包左其他幾盤餸，樣樣KO晒，我地真係好擦得，食得多又食得快．
食完飯又無無聊聊，睇下電視，係播陳奕迅舊片，好過睇馬拉片咁啦．出沙灘望左下，天氣唔好，無咩星～～真係好悶好悶，9:30pm瞓覺，難怪漁村咁多細路！
沒有留言:
張貼留言