未起程先鳴謝登機閘口地勤人員，事源回程online check in 做唔到，話欠HK$120，原來電腦出錯當大小姐係成人追收機場稅．地勤百忙中幫忙聯絡Air Asia攪清楚，仲認住我嚮候機室坐邊走黎告知結果，起初以為佢地係Air Asia職員，原來係另一間公司人員，真係唔該晒佢地，多謝！多謝！
入正題，飛機準時8:05PM起飛，只得一半滿，初二都唔full，真奇怪！大部分強國人，好嘈，有位小朋友高八度講足三小時，我唔怪佢，只怪佢爸爸做咩唔預備遊戲機／書本之類消磨時間，另一位小朋友一上機就做奧數，雖然殘忍d，但起碼唔影嚮其他人麻！
嚮一片“爸爸”“爸爸” （高八度普通話）聲中，飛機11:05PM抵達沙巴，機上無派入境卡，要花小小時間填完先過關．
一出關就見到劉先生，我地位導遊，三年前都係搵佢，服務好好，今年咩都無諗一於搵番佢．劉先生外貌無變，但出左部van自己做老闆，恭喜晒！第一站去左Sedco Square，即雙天大排檔果度宵夜，咁夜唔食海鮮喇，點了燒雞翼、串燒、煎餃、窩湯麵，當然唔小得桔仔水．
食完就去Tune Hotel check in ，三年前住過，清潔仲keep到．但位置遠離市中心，唔係超平都唔好訂，訂房加埋冷氣約HK$100一晚，明天去美人魚島，只用黎放行李，去美人魚島的路程又近d，咁都算OK啦．
沒有留言:
張貼留言