Day 2 Tomamu Resort

Day 2 酒店早上有免費機場送迎巴士服務, 第二朝落酒店前台問, 原來要早一日預定, 宜家差不多8點, 最快只可坐8:30班次, 唔等喇, 請酒店call的士直接去Mazda 空港店, 方便又直接.

呢度解釋下租車counter, 所有車行攞車地點都唔係嚮機場, 而係南千歲駅Rera Outlet附近, 新千歲空港果個只係接待處, 出示booking單據便會有車送到南千歲租車店攞車, 我地宜家嚮千歲駅, 只搭一站就係南千歲, 兩個站先到新千歲空港, 所以坐的士去南千歲攞車係最直接既方法,車費1250yen, 都ok啦!

抵達Mazda出示訂車單據, 好快辦好手續, 我地訂車經http://www.hokkaidorentacar.com/ 1300cc 連4wd & 雪軚, 每日只需3500yen, 車行仲upgrade左架1500cc車俾我地, 原本尋日攞車, 今日先攞車行都扣減番一日錢.

辦好手續就出發啦, 嚮便利店買豬肉包及飯團做早餐, 天寒地凍, 飯團可以丁翻熱先食, 又幾好喎!

今日天晴, 但地面尚有積雪, 沿路見樹枝上掛上薄雪, 好靚, 途中仲見到野鹿.

沿途交通暢順, 11:00已抵達日高道の駅, 呢度馬油幾出名, 買左一樽70g 1300yen, (跟住幾日都搽馬油潤膚, 但小姐鍾情羊脂膏, 爸爸又話搽馬油敏感, 所以得我一個用, 我又覺得幾潤呀!) 跟手食埋碗喬麥麵,但熱食麻麻地!

再向Tomamu Resort出發. 12:20抵達, 辦好手續未有鎖匙, 於是去polar village玩下先. 一出門見有shuttle bus, 工作人員叫我地上車, 其實轉過彎就到, 行都行到. 房租包了玩了5000米雪上電單車 or 香蕉船,我地當然選擇玩雪上電單車, 小童係免車費跟車架, 所以小姐仲可以玩香蕉船, 爸爸陪伴玩, 於是再買多張大人香蕉船票, 多謝1575yen.

第一次玩雪上電單車, 我起初都幾擔心, 揸車係我弱項麻, 但揸落又幾容易, 仲學人飛車, 中途停低影相, 背景係酒店和滑雪場, 好靚呀!

玩完雪上電單車, 跟手玩香蕉船.

玩完仲有時間, 爸爸再encore雪上電單車, 今次玩10000米賽道, 小姐繼續做免費乘客, 5250yen, 原本40分鐘的路程, 佢地開得快, 30分鐘玩完.

玩晒仲有時間打陣雪戰.

14:30 怕且有房卦, yeah! 返到the Tower, 果然有房, 今晚住4人房, 好大間呀, 一邊地台放了4張床, 一邊放兩張梳化, 窗外望滑雪場, 好正.

拿拿聲執好泳衣, 我地又趕下場! 太多野玩, 行程緊密呀!

去了viz spa house游水及浸溫泉, 大人2500yen, 小童1000yen, 我地有八折coupon, 折左都係貴, 其實我同爸爸都無點游水, 應該齋買溫泉券,每人只需800yen咋

一入場小姐就玩了大圓球, 免費架, 但每日限時限刻, 玩得好短時間, 小姐主力游水, 沖浪.

呢位...起初以為係人地爸爸, 原來係工作人員, 隻腳有D行動不便, 作為僱主, Tomamu又幾好.

我同爸爸就浸jacuzzi, 跟手浸埋溫泉, 雖然唔係真溫泉, 但環境好靚, 特別係黃昏magic hour, 望住池外的樹林, 雪地和燈光, 好正!

玩到17:00就去ice village, 時間尚早, 好小人

冰滑梯.

ice hotel

ice restaurant

我地夾手整左個冰杯, 再去冰bar買果汁, 共1300yen, 三人一隻, 志在試下, 況且小姐開頭興致勃勃係咁鑿, 10分鐘之後都係爸爸接手攪掂!

18:30 Hal食自助餐, 新餐廳, 望住水の教堂入口, 環境似乎舊的森林餐廳靚d喎.

食物就好好味, 呢餐主攻以下三款已經心滿意足!

鐵板和牛好鮮嫩, 此行食到最靚的牛肉, 但師父有時貪快會用蓋焗一焗,咁就出事, 變得太熟鞋口

北寄貝刺生飯, 苫小牧出品, 飽都要食多碗

魚生呢…師父砌埋花架, 單睇賣相都掂; 前面似jelly係豉油, 好特別呢!

21:00睇埋水の教堂和冰の教堂, 就嚮hal門口集合咋, 好方便! 夜晚打晒燈, 我覺得冰の教堂仲浪漫d.