快樂日子好快過, 話咁快又完成了旅程! 除了第一日航班延誤去唔到支笏湖之外, 整個旅程好順利.
Day 1 整定我今次旅程要飛東京…話說去到札幌上空,機場竟然關閉除雪,飛機轉飛東京加油, 降落新千歲機場已經21:00, 去唔到支笏湖, 唯有入住千歲市商務酒店Horin.
Day 2 早上08:00去Mazda 千歲空港店攞車, 開往Tomamu, 沿途有積雪但唔難揸, 日高道の駅食完午餐先入Tomamu Resort. 12:30抵達, 玩了雪上電單車, 香蕉船, 去viz house游水及浸溫泉, ice village 整冰杯; 18:30 Hal食好味自助餐, 鐵板和牛, 魚生, 北寄貝刺生飯, 諗起都想食; 21:00睇埋水の教堂和冰の教堂, 大滿足!
Day 3 Hal食自助早餐, 09:30去sport centre 租雪具滑雪, 玩到16:00, 揸車到帶廣, 沿途無積雪, 一小時車程已經抵達, 買了六花亭custard roll消夜, 去帶廣駅Esta食豚丼, Comfort Hotel check in埋先去十勝川睇彩澟華, 呢個祭好一般!
Day 4 繼續天晴, 08:00去然別湖浸露天溫泉, 望住潔白的湖面浸, 好正!好正! 這裡冰bar亦較Tomamu規模大! 11:30開往阿寒湖, 中途誤打誤撞吃了碗靚拉麵, 阿寒湖冰釣, 揸四輪車, 冬華美雪祭玩据冰睇煙火, 鶴雅將我地由本館upgrade去別館, 又是大滿足的一天!
Day 5 10:00 經阿寒橫斷公路往摩周湖, 早上天氣仍然良好, 睇完摩周湖開始落雪, 到硫磺山時d雪打橫吹埋黎, 川湯駅Orchard Grass吃了美味燴牛肉飯及浸足湯, 下午去砂湯, 仍然下大雪, 漂雪下浸古丹溫泉, 冰火兩極, 勁正! 經美晃峠到船長の家, 17:30抵達, 沖完涼食蟹大餐, 時間啱啱好!可惜帝王蟹的肉比較削, 失望, 毛蟹和其他食物就唔錯.
Day 6 07:30 拎埋行李上車先食早餐, 尋晚下了雪, 要先掃雪才可開車, 08:50 抵達網走碎冰船碼頭, 距離開船時間尚早, 佔了好座位, 破冰喇.....都幾大舊冰, 開心! 10:30落船後又玩流冰漫步, 位置正好在網走駅至北濱駅中間, 玩完順理成章去了北濱駅, 流冰號剛巧到站, 走了上車影相, 賺到了! 遊埋冷清的白鳥公園就去了鰭月吃壽司, 附近有Uniqlo又有超市, 逛到15:30才開車往層雲峽. 沿途多車, 18:15才抵達. 酒店滿室, 大浴場竟然要等位沖涼, 自助餐唔好食, 冰瀑祭又人山人海, 將日間的美好破壞晒!
Day 7 09:30開車, 早上大雪仍下個不停, 10:40進入旭山動物園, 睇企鵝巡遊, 參觀了幾個館, 12:00便離開了. 到了拉麵村吃一藏拉麵, 下午想去當麻町營滑雪場滑雪, 原來無雪具租, 滑左幾次雪兜便走了. 明天旭川雪祭開鑼, 我們提早去了常盤公園睇大雪像. 16:00回札幌, 有段高速公路因大雪封閉, 花了3小時才回到札幌. Check in 後便去大通公園和薄野睇雪祭, 因為在會場已經食食食, 最後連成吉思汗都無食便回酒店休息.
Day 8 原本今朝係購物時間, 但小姐想滑雪, 於是改為去手稻滑雪場, 呢個滑雪場曾舉辦冬季奧運會, 規模唔細, 當日勁多中小學生由學校安排來滑雪, 泊滿過百架旅遊車, 莫非當地體育課就是教滑雪?! 玩到16:00就去小樽, 尚有時間去界町通逛逛, 食Letao 芝士餅, 燒蠔, 燒帶子, 燒粟米, 食飽飽就行運河會場及舊手宮線會場, 佈滿雪燈真係好靚. 20:00食晚飯, 反高潮, 唔食壽司, 唔食蟹意粉, 竟去了牛角吃網燒, 只因我地都鍾意吃網燒, 今晚已經係最後機會.
Day 9 08:00往場外市場味の二幸吃魚生飯, 追加兩隻牡丹蝦, 大滿足! 09:30行高速公路往Rera Outlet, 45分鐘抵達, 無咩買, 行到11:45就過隔離Mazda還車, 再坐租車公司專車到新千歲機場, 臨上機當然又掃手信, 六花亭, 柳月, 北果樓, 白之戀人, potato farm薯條......講得出既, 國內線呢邊都買到…點解我地會嚮國內線? 因為坐日航要經東京轉機, 22:30安全抵港!
整個行程....同原定既跟到80%, 去唔到支笏湖, 無嚮札晃shopping, 但多左上流冰號影相, 睇埋旭川雪像, 去手稻滑雪, 行程更豐富.
天氣幾好, 有落雪但唔係暴雪, 行程完全無受影嚮, 日間氣溫-1至-5, 夜晚大約-10, 都ok, 唔算太凍!
租車就由7日變揸足全程, 行左1250公里, 車租28900yen, 入油14000yen, 高速公路費2250yen, 泊車1600yen; 經呢間agent 訂mazda車, 1300cc 連4wd & 雪軚, 車行upgrade左1500cc俾我地.
http://www.hokkaidorentacar.com/
出發前最擔心雪地開車, 道路大部分除左雪, 開車唔算困難, 鄉郊就算舖滿雪都唔難揸, 最麻煩係地面結冰, 好容易控制唔到部車, 一定要開得好慢, 預留距離停車, 呢個情況以札幌最嚴重, 見到當地的士都跣軚! 我地最危險係有次紅燈前路面結冰, 剎唔到車要衝燈!
食方面, 最回味係Hal 既鐵板和牛和北寄貝刺生飯, 仲有六花亭custard roll.
沒有留言:
張貼留言