D17&18 熊本>>鳥栖>>福岡

今天預備了兩個行程, Plan A: 阿蘇火山>>黑川溫泉>>鳥栖>>福岡.  

但昨晚商量後一致決定輕輕鬆鬆行Plan B: 熊本>>鳥栖>>福岡.

Chisun Inn的早餐比較日式, 味道好好.

住了熊本兩晚, 今天才正式踏進市中心.

早上先逛熊本城, 入場每位500yen, 外觀都幾靚, 但天守閣是重建的, 可觀性不大.

天守閣最頂看見的景色

10:30到鶴屋百貨, 泊車都幾貴, 500yen一小時, 消費3000yen享2小時免費泊車, 即是點都要買D野.

鶴屋百貨有熊本熊辦公室, 11:00有熊本熊會面時間 (暑假每天11:00 及15:00各一場), 10:45抵達已經好多人, 原來有人數限制, 同埋開始左就唔準入場.

熊部長經常到各地推廣業務

11:00 準時show time, 熊本熊好cutie, 日本人好投入, 但我地聽唔明, 又唔係super fans, 有D悶.

大約30分鐘, 完show才開放部長辦公室參觀, 顧客亦開始選購紀念品.

高樓層亦有熊本熊產品發售, 大小姐去了睇, 我就逛時裝、手袋、鞋.

匯合後去了逛上下通, 熊本主要的購物大道, 但無咩睇, 好快走左.

雞湯拉麵電車, so cutie

13:30到了熊本駅附近吃黑亭拉麵, 不愧是名店, 位處民居閒日都有人龍, 等了15分鐘入席.

每人一客夏日限定set, 有义燒拉麵, 肉燥飯一小碗和汽水, 1280yen, 好抵食. 拉麵黑蒜味, 幾特別, 义燒份量足但硬左小小, 肉燥飯超美味, 拍得住台灣出品.

食完出發去鳥栖outlet, 又用金錢換時間, 行highway 2200yen.

15:30抵達, 閒日outlet唔多人, 但呢2星期已經買買買大出血, outlet的價格和出面減價差不多, 最後都只係買左小小野.

17:00 去鳥栖季樂吃佐賀牛, 其實未肚餓, 但今晚20:00前要還車, 要早D吃晚飯.

 點了客3-4人set, 好大份, 有2塊佐賀西冷, 幾片佐賀牛和幾片和牛, 其他是雞、豬和腸仔, 原本有內臟, 唔要改左雞, 整個set變了好多雞肉, 早知問侍應可唔可以改牛肉或牛舌啦.

D牛肉真係無得頂, 佐賀牛唔洗講, 正到暈, 連普通和牛油脂都好均勻.  連酒水共13650yen.

18:40食完, 行國道和highway只相差20分鐘車程, 起初打算行國道, 但諗諗下都係搏唔過, 放工時間一定多車, 最後行highway都用了50分鐘, 收費1240yen, 19:30回到福岡, 入埋油, 酒店放低行李再還車, 時間剛剛好.

今晚都係住Sutton Hotel family room, 6000yen, 素泊, 今晚係禁煙房, 12樓, 其實之前住吸煙房都無煙味, 但走廊有小小煙味同埋係4樓底樓層.

Check in 時問左酒店門口有巴士到福岡國際機場, 仲俾埋時間表, 07:45的班次都適合, 每位270yen, 都好方便, 決定明天搭巴士到機場.

休息一會去了河邊尋找屋台宵夜, 路經Canal City又逛一逛. 

去到河邊, 屋台得三三兩兩, 大家又未肚餓, 最後放棄無食. 

行行下竟然又去左中洲川端紅燈區, 大小姐最討厭呢D環境. 最終在便利店吃了關東煮和雪糕, 結束日本最後一夜.

  

D18回港

一早和爸爸到了酒店對面すき家食300yen牛丼早餐, 大小姐選擇唔食瞓晏D.

07:45坐巴士到機場, 10:45 飛機準時起飛, 18天東南西北大暴走行程完滿結束.