D17 經澳門回港

今日回港了~~ 華欣幾日都係天陰, 今日卻放晴, 都算好彩既, 否則揸電單車曬到變人乾~



雖然知道華欣一街都係租車檔仔, 去機場約1600b, 但安全起見, 出發前預約了車由華欣到曼谷機場, 2000b, contact 係namsai_cnn @ xxxx
約司機9:45am, 一直都唔見人, 10am打電話去租車公司, 回覆on the way黎緊, 5 分鐘到, 5 分鐘之後唔見人, 再追, 話sms 司機電話俾我又無件事, 點攪架!!! 酒店車去機場收3000b, 好貴! 租電單果度都有車去曼谷, 即刻打電話去, 收1700b, 仲平d. 老闆娘話即刻揾車黎!

10:25am 終於有車到, 原來係預先電郵果間黎左, 足足遲左40分鐘, 離晒譜, 啱啱訂果間又唔知幾時到, 當然上車先, 但我仲好嬲, 炳個司機遲大到, 佢call boss, 減左200b, 收1800b, 條氣先順番小小!!

開車後致電電單車老闆娘say sorry, 唔好意思, 呢度幫你賣下廣告:



好彩坐長途車, 我預鬆左時間, 唔洗趕!! 架車都幾新幾舒服, 司機都開得快, 交通暢順, 2.5小時就到曼谷機場, 當時先1pm, 飛機3:40pm起飛, 仲有充足時間~check in 之後去食午餐, 選了3樓一間連鎖餐廳 S&P~

燒豬手加左泰式辣汁, 醒胃~

一人一碗冬蔭功湯河粉, 湯好好味, 但D粉實在太小, 得幾條~

3樣野共650b, 貴左d, 但機場可以接受!!
買芒果糯米飯上機食, 3樓多數150b一份, 去了地下Magic Food Court, 50b果d得幾片芒果, 於是買100b果D, 睇落有一隻芒果, 點知呃人既, 最底係放左粒"核"扮好大份, 芒果糯米飯連芒果核上, 都係第一次見@.@

3:40pm準時開機~



澳門機場好細, 落機好有效率, 7:20pm抵達, 落機行幾步到入境counter, 同時間得我地一班機降落, 好快就拎埋行李, 前後15-20分鐘攪掂.

因為擔心航班有延誤, 買左11pm船飛回港! 先坐酒店穿梭車去酒店寄存行李, 咁啱威尼斯人車到, 就去威記!

放好行李去官也街食飯, 威記新開左條自動行人電梯通去官也街, 唔洗10分鐘就到~




銀河夜景幾靚~



目標都係食葡餐, 想去試新木偶, 但神推鬼x, 去左熊貓~



裝飾懷舊, 即係無翻新, 星期六都唔滿, 食客以港人為主~

脆豬, ok 喎~

青菜薯蓉湯, 唔夠薯蓉, 好"稀"~



燒鱔, 正!

非州辣雞, 唔係全隻, 所有係雞腿肉, 好多汁, 水汪汪, 同其他餐廳唔同, 麻麻地, 我鍾意乾身d~

雜菌炒椰菜, ok~

無點飲品, HK$330, 唔算貴, 份量足, 味道就一般啦, 燒鱔最好食~~
回威尼斯人, 仲有時間, 去天幕商場行一陣, 10:15pm坐酒店穿梭車去氹仔碼頭, 11pm開船, 落船搭的士, 12:30am安坐家中!! 
呢個trip最鍾意都係龜島, Freedom Beach & Sai Nuan Beach好靚; Lighthouse Bay一海都係海葵好震撼; Nang Yuan海底都係咁靚但一樣咁多遊客.
華欣早期有d悶, 後兩日d景點幾好, 愛與希望之宮, Santorini Park, 葡萄園和Cicada Market都藉一遊!
又完一個trip, 下一站北海道及大阪~~