未出發先激氣

打完預備篇, 順手想打埋航班時間, 一check之下大件事, 吉隆坡至Kota Bharu改左航班, 原訂18:15提早左40分鐘至17:35, 轉機時間得番兩小時, AirAsia唔係check through, 兩小時點夠入境, 拎行李再check in, 就算唔寄倉都好趕好趕.

拿拿聲打去HK Hotline, 回覆係航班更改小於45分鐘, 唔可以免費轉下一班, 吓, 就差果5分鐘, 大佬, 我唔夠時間轉機喎…..講左好耐, 火都黎先話幫我同大馬總部申請, 3個工作天後回覆.

如是者, 等了3個工作天, 答案係總部唔批, 上訴就自己上AA網頁提出要求. OK,又打左洋洋千字提出申請改下一班, 今次要5個工作天後回覆.

其間…諗諗諗, 點算好, 俾錢買下一班?! 坐通宵夜車去Kota Bharu?! 留嚮吉隆坡唔去停泊島?! 真係好嬲又好down, 成年前買機票, 臨出發先轉航班時間, 激死人!

等!等!等! 今朝終於收到大馬電話, sorry, we cannot accede to your request……唔係麻! 又花一輪唇舌, 解釋再解釋, 訴苦再訴苦, CS話再幫我問下manager……but no promise….

下午, 終於……有好消息, 幫我轉下一班, 嘩! 皇恩浩蕩呀! 仲提我下次轉機要預3小時! 喂, 我宜家都預2小時45分啦! 算, 你俾我轉就算, thank you very much la!! 新航班係20:30, 即係轉機要5小時!!

由18號至今, 經過了9天的煎熬!

如果你問:下次還會搭AA嗎? 會….一早訂左暑假機票;
下次還會訂AA嗎? 可能會….如果機票夠平;
下次還會搭AA轉機嗎? 應該唔會….慳左唔夠買驚風散.